शिवसेनेच्या आमदारांपाठोपाठ सेनेचे खासदारही बंडखोरीच्या तयारीत असल्याच्या बातम्या समोर येत आहे. यादरम्यान शिवसेनेला अनेक नवे धक्के बसत आहेत. शिवसेनेच्या अडचणी कमी होताना दिसत नाहीयेत. राज्यात शिंदे-फडणवीस सरकार स्थापन झाल्यानंतर आता अनेक नगरसेवकही एकनाथ शिंदे यांच्या गटात सहभागी होत आहेत. अशात आता मनसेनं या सर्व परिस्थितीवरुन शिवसेनेवर टीका केली आहे.
मनसेचे प्रवक्ते गजानन काळे यांनी ट्विट करत आदित्य ठाकरे आणि संजय राऊत यांच्यावर निशाणा साधला आहे. दरम्यान ही गळती थांबवण्यासाठी आता आदित्य ठाकरे मैदानत उतरले आहेत. बंडखोर आमदार यामिनी जाधव यांच्या भायखळा मतदारसंघातून आदित्य ठाकरेंच्या निष्ठा यात्रेला सुरूवात होणार आहेत, या यात्रादरम्यान ठाकरे हे शिवसेनेत उरलेल्या निष्ठावान कार्यकर्त्यांशी संवाद साधणार आहेत. फक्त मुंबईतच नाही तर त्यांची ही यात्रा राज्यभरातील बंडखोर आमदारांच्या मतदारसंघात देखील जाणार आहे.
यावरही गजानन काळे यांनी निशाणा साधला आहे. ‘पक्षातील गळती थांबावी म्हणून छोटे नवाब आता निष्ठा यात्रा काढणार आहेत म्हणे…! खरं तर ‘चमत्कार बाबा’ संजय राऊत यांना कायमचं राष्ट्रवादी काँग्रेसमध्ये पाठवलं तरी यांच्या नवाब सेनेवरील विघ्न टळेल. मात्र यांचं आपलं झालंय असं की जखम एकीकडे, मलम भलतीकडे’, असं गजानन काळे यांनी आपल्या ट्विटमध्ये म्हटलं आहे.