प्रसिध्द अभिनेत्री प्रियंका चोप्रा आणि पती अमेरिकन गायक निक जोनास यांनी सरोगसीद्वारे आपल्या बाळाला जन्म दिला आहे. प्रियंकाने स्वत: सोशल मीडियाद्वारे ही बातमी दिली आहे. निकला टॅग करत इंस्टाग्रामवर एक नोट शेअर करत प्रियांकाने लिहिले आहे.
प्रियांका म्हणते की, आम्ही सरोगेटद्वारे बाळाचे स्वागत केले आहे. हे सांगताना आम्हाला खूप आनंद होत आहे. आम्ही आमच्या कुटुंबावर लक्ष केंद्रित करत असल्यामुळे आम्ही आदरपूर्वक गोपनीयतेची विनंती करतो. निक जोनासनेही हीच पोस्ट आपल्या इंस्टाग्राम अकाउंटवर शेअर केली आहे.
प्रियांका चोप्रा आणि निक जोनास यांनी डिसेंबर २०१८ मध्ये लग्न केले. हे जोडपे मेट गाला २०१७ या भव्य फॅशन इव्हेंटमध्ये भेटले, जिथे त्यांनी डिझायनर राल्फ लॉरेनचे प्रतिनिधित्व केले. प्रियंका चोप्राची अंगठी काढण्यासाठी गायकाने न्यूयॉर्कमधील टिफनीचे संपूर्ण स्टोअर बंद केले होते. लंडनमध्ये सुट्टी घालवताना त्याने प्रियांकाला वाढदिवसाच्या दिवशी प्रपोज केले होते.