ठाणे | ठाणे येथील टेंभीनाका परिसरातील जैन मंदिरामध्ये शनिवारी आयोजित कार्यक्रमासाठी महाराष्ट्र नवनिर्माण सेनेचे अध्यक्ष राज ठाकरे हे विशेष अतिथी म्हणून उपस्थित राहणार आहे. या कार्यक्रमानंतर ते शहरात दोन ठिकाणी भेटी देण्याबरोबरच शहरातील प्रमुख पदाधिकाऱ्यांसोबत बैठक घेऊन त्यांच्याशी चर्चा करणार असल्याची माहिती सुत्रांनी दिली. त्यामुळे राज ठाकरेंच्या या दौऱ्याकडे सर्वांचेच लक्ष लागलेले आहे.
महिनाभरातील हा त्यांचा दुसरा ठाणे दौरा असून आगामी पालिका निवडणुकांच्या पार्श्वभूमीवर त्यांचे दौरे राजकीय दृष्ट्या महत्वाचे मानले जात आहेत. ठाणे येथील टेंभीनाका परिसरात शिवसेनेचे दिवंगत जिल्हाप्रमुख आनंद दिघे यांचे कार्यालय असून येथून आता बाळासाहेबांची शिवसेना या पक्षाचे कामकाज चालते. त्यामुळे टेंभीनाका परिसर हा संपुर्ण जिल्ह्याचा राजकीय केंद्रबिंदू म्हणून ओळखला जातो. याच भागात जैन समाज मोठ्या प्रमाणात राहत असून या समाजाचे या भागात मंदीर आहे.
या मंदीरामध्ये जैन समाजाच्यावतीने एका कार्यक्रमाचे आयोजन करण्यात आलेले असून या कार्यक्रमासाठी राज ठाकरे हे विशेष अतिथी म्हणून उपस्थित राहणार आहेत. राज यांच्या दौऱ्याची तयारी ठाण्यातील मनसेच्या पदाधिकाऱ्यांनी सुरु केली आहे. जैन मंदीरातील कार्यक्रम पार पडल्यानंतर राज ठाकरे हे शहरात दोन ठिकाणी भेटी देणार असून त्यांच्या या भेटी खासगी असणार आहेत. यानंतर ते ठाण्याच्या शासकीय विश्रामगृहामध्ये शहरातील प्रमुख पदाधिकाऱ्यांची बैठक घेऊन त्यांच्याशी चर्चा करणार आहेत, अशी माहिती सुत्रांनी दिली.