पुणे : पुण्याचे महापौर मुरलीधर मोहोळ यांना कोरोनाची लागण झाली आहे. तसेच आतापर्यंत महापौरांसह पाच नगरसेवकांना आणि एका उपायुक्तांना कोरोनाची बाधा झाली असून चारही नगरसेवक कोरोना मुक्त झाले आहेत.
मुरलीधर मोहोळ यांना ताप आल्याने त्यांची कोरोना चाचणी करण्यात आली होती. मात्र, शनिवारी (4 जुलै) सायंकाळी अहवाल पॉझिटिव्ह आला. त्यानंतर मुरलीधर मोहोळ यांनी ट्विट करत याबाबतची माहिती दिली.
दरम्यान, थोडासा ताप आल्याने मी माझी #COVID-19 टेस्ट केली असता, ती पॉझिटिव्ह आली आहे. माझी प्रकृती स्थिर असून लवकरच बरा होऊन पुन्हा तुमच्या सेवेत असेल. उपचारादरम्यान सर्व यंत्रणांच्या संपर्कात राहून परिस्थितीचा आढावा घेत राहील, असं ट्विट मुरलीधर मोहोळ यांनी केलं आहे.
पुणे महापालिकेत आतापर्यंत दोनशे जणांना कोरोनाची लागण झाली आहे. यापैकी तब्बल 22 कर्मचाऱ्यांचा मृत्यू झाला आहे. तर, 80 कर्मचारी रुग्णालयात उपचार घेत आहेत. तर, 108 कर्मचाऱ्यांना डिस्चार्ज देण्यात आला आहे.