पुण्यात एका उद्यानाच्या नावाचा वाद पेटला आहे. मुख्यमंत्री एकनाथ शिंदे आज पुण्यात त्यांच्याच नावाने उभारण्यात आलेल्या उद्यानाचे उद्घाटन करणार आहेत.मात्र हे नामकरण नियमबाह्य असल्याची तक्रार स्वयंसेवी संघटनांनी केलीय. त्यामुळे हा वाद पेटलाय. दरम्यान, शिवसेनेत एकनाथ शिंदे यांच्या बंडानंतर मोठी फुट पडली आहे. राज्यात राजकीय वातावरण चांगलेच पटले आहे. शिंदे गटाचे आमदार आणि उद्धव ठाकरे यांच्या शिवसेनेचे आमदार एकमेकांवर टीका करत आहेत.
एकनाथ शिंदेंच्या बंडानंतर युवासेना प्रमुख आदित्य ठाकरे राज्यभरात शिव संवाद यात्रा, निष्ठा यात्रा करत आहेत. या यात्रेदरम्यान आदित्य ठाकरे शिवसैनिकांना संबोधित करत आहेत. अशातच आज मुख्यमंत्री एकनाथ शिंदे आणि युवासेना प्रमुख आदित्य ठाकरे आमने-सामने येणार आहेत. मुख्यमंत्री एकनाथ शिंदे आज पुणे दौऱ्यावर जाणार आहेत. एकनाथ शिंदे सकाळी पुण्यातल्या कात्रज चौकामध्ये आमदार तानाजी सावंत यांच्या निवासस्थानी भेट देणार आहेत. त्याचवेळी आदित्य ठाकरे हे कात्रजमध्ये शिवसैनिकांसोबत संवाद साधणार आहेत. त्याचवेळी मुख्यमंत्री शिंदे हे पुण्यात आहेत.
शिंदे आज पुण्यात त्यांच्याच नावाने उभारण्यात आलेल्या उद्यानाचे उद्घाटन करणार आहेत. मात्र हे नामकरण नियमबाह्य असल्याचा आरोप होत आहे. मनपाच्या जागेवर हडपसर भागात हे उद्यान उभारण्यात आले आहे. शिंदे समर्थक माजी नगरसेवक प्रमोद भानगिरे यांनी या उद्यानाला एकनाथ शिंदे यांचं नाव दिले आहे. जागा मनपाची असली तरी त्यासाठीचा खर्च आपण केल्याचा दावा भानगिरे यांनी केला आहे. पण नामकरणाला प्रशासकीय मान्यता नाही. याच परिसरात उभारण्यात आलेल्या बाळासाहेब ठाकरे फुटबॉल मैदानाचे उदघाटनही मुख्यमंत्र्यांच्या हस्ते होणार आहे.