नवी मुंबई | भाजप आमदार गणेश नाईक यांनी रिव्हॉल्वर दाखवून जिवे मारण्याची धमकी दिल्याचा आरोप करणाऱ्या महिलेने आता त्यांच्याविरोधात थेट लैंगिक शोषणाची तक्रार नेरूळ पोलिस ठाण्यात दाखल केली आहे. त्यामुळे नेरूळ पोलिसांनी नाईक यांच्यावर बलात्काराचा गुन्हा दाखल केला आहे या तक्रारीमुळ गणेश नाईक यांचे पाय आणखी खोलात रुतले दिसून येत आहे.
या प्रकरणातील तक्रारदार महिला १९९३मध्ये वाशी सेक्टर-१७मधील बिग फ्लॅश स्पोर्ट्स क्लब येथे रिसेप्शनिस्ट म्हणून काम करत होती. यावेळी नाईक वारंवार क्लबमध्ये बैठकीसाठी येत असत. ओळख झाल्यानंतर ते मला संपर्क करीत होते. सन १९९५पासून आमच्यातील मैत्रीचे प्रेमात रूपांतर झाले. त्यावेळी नाईक यांनी मला पारसिक हिल येथील बंगल्यात नेऊन शरीरसंबंध प्रस्थापित केले. पुण्यात फिरण्यासाठी गेल्यानंतरही आमच्यामध्ये संमतीने शरीरसंबंध प्रस्थापित झाले, असे या महिलेने तक्रारीत म्हटले आहे.
नोव्हेंबर २००६मध्ये गणेश नाईक यांच्यापासून गर्भवती राहिल्यानंतर सहाव्या महिन्यात एप्रिल २००७मध्ये त्यांच्या सांगण्यावरून मी न्यू जर्सी येथे राहण्यास गेले व १८ ऑगस्ट २००७मध्ये मुलाला जन्म दिला. तो दोन महिन्यांचा असताना नाईक स्वत: मला व मुलाला घेण्यासाठी अमेरिकेला आले होते. त्यानंतर त्यांनी आम्हाला नेरूळमधील सीब्रीज टॉवर इमारतीत राहण्यास नेले. ते आठवड्यातून तीन वेळा घरी येत असत. त्यावेळी त्यांनी जबरदस्तीने शारीरिक संबंध प्रस्थापित करून लैंगिक शोषण केले, अशी तक्रार या महिलेने केली. त्यानुसार नेरूळ पोलिसांनी गणेश नाईक यांच्याविरोधात बलात्काराचा गुन्हा दाखल केला आहे.