राज्यपाल भगतसिंह कोश्यारी यांनी छत्रपती शिवाजी महाराजांबाबत केलेल्या विधान त्या पाठोपाठ प्रसाद लाड यांनी जन्मस्थळाबद्दल केलेल्या विधानाचे पडसाद अद्यापही उमटत आहेत.महाविकास आघाडीसह अन्य नेतेही राज्यपाल हटाव या भूमिकेवर ठाम असल्याचे दिसत आहेत. यानंतर भाजप नेते आणि आमदार प्रसाद लाड यांनीही छत्रपती शिवाजी महाराजांबाबत केलेल्या वक्तव्यावरून विरोधक आक्रमक झाले.
तर दुसरीकडे आता भाजपच्या एका केंद्रीय मंत्र्याने छत्रपती शिवाजी महाराजांचा एकेरी उल्लेख केल्याचे सांगितले जात आहे. यावरून आता नवा वाद उफाळण्याची शक्यता असल्याचे म्हटले जात आहे. केंद्रीयमंत्री रावसाहेब दानवे यांनी छत्रपती शिवराय यांचा एकेरी उल्लेख केल्याने पुन्हा वाद उफाळण्याची शक्यता असल्याचे म्हटले जात आहे. शिवाजी महाराजांचा एकेरी उल्लेख केल्याचा रावसाहेब दानवेंचा एक व्हिडिओ सोशल मीडियावर व्हायरल झाला आहे. यानंतर रावसाहेब दानवेंवर सर्वच स्तरातून टीका होत आहे.
राज्यात होणाऱ्या छत्रपती शिवाजी महाराज यांच्यावरील वक्तव्याप्रकरणी प्रतिक्रिया देतानाचा रावसाहेब दानवे यांचा व्हिडिओ व्हायरल होत आहे. या व्हिडिओमध्ये छत्रपती शिवाजी महाराजांवरील वक्तव्याची चौकशी व्हायला हवी. वक्तव्य वादग्रस्त होईल की नाही, हे तपासण्यात यावे, असे सांगताना रावसाहेब दानवे दिसत आहेत. तसेच आपणही शिवप्रेमी असल्याचे रावसाहेब दानवे नमूद करत आहेत. मात्र, याच व्हिडिओत पुढे बोलताना दानवे यांनी छत्रपती शिवाजी महाराजांचा एकेरी उल्लेख केल्याचे दिसून येत आहे. यावरून नव्या वादाला तोंड फुटण्याची शक्यता वर्तवली जात आहे.