ठाकरे गटाचे आमदार नितीन देशमुखांना नागपूर पोलिसांनी ताब्यात घेतले आहे. राज्याचे उपमुख्यमंत्री देवेंद्र फडणवीस यांच्या निवासस्थानी खारपान पट्ट्यातील क्षारयुक्त पाणी टँकरने घेऊन जात असताना देशमुख यांना धामणा परिसरात अडवण्यात आले. दरम्यान, पाणीप्रश्नावर अकोला ते नागपूर यात्रा काढणाऱ्या आमदार नितीन देशमुख यां अटक झाली आहे. नागपूरच्या हद्दीबाहेर पोलिसांनी रोखले आणि अटक केली.
तर दुसरीकडे हे सरकार जनतेलाच घाबरु लागले, असे खासदार संजय राऊत यांनी ट्विट केले आहे. नितीन देशमुख यांच्या ‘जल यात्रे’ला नागपूर पोलिसांनी परवानगी नाकारली होती. असे असतानाही यात्रा काढण्यात आली. मात्र, आता देशमुखांना ताब्यात घेण्यात आले आहे. अकोल्यातील बाळापूर विधानसभा मतदार संघामधील 69 खेडी योजनेवरील स्थगिती उठवण्यात यावी, अशी मागणी त्यांनी केली आहे.
या मागणीसाठी नितीन देशमुख यांनी आपल्या समर्थकांसोबत अकोला ते नागपूर पायदळ यात्रा काढली. खारपान पट्ट्यातील खारं पाणी उपमुख्यमंत्री देवेंद्र फडणवीस यांना आंघोळ घालण्यासाठी ही यात्रा काढण्यात आली होती. देशमुखांना आता ताब्यात घेतल्यानं राऊतांनी सरकारवर निशाणा साधला आहे. आता याच मुद्द्यावरून पुन्हा एकदा राज्यातील राजकीय वातावरण तापण्याची शक्यता वर्तवली जात आहे.
