महाराष्ट्रातील जनतेसाठी आणि महाराष्ट्रातील राजकारणातील अत्यंत महत्त्वाची बैठक मुंबईच्या वरळीतील नेहरू सेंटरच्या चौदाव्या मजल्यावर पार पडली.
तब्बल दोन तास ही उच्चस्तरीय बैठक सुरु होती. या बैठकीत मंत्रालयाच्या सहाव्या मजल्यावर कोण बसणार हे नक्की करण्यात आल्याची माहिती समजतेय. दरम्यान, महाविकास आघाडी कडून उद्या पत्रकार परिषद घेऊन याबद्दलची सविस्तर माहिती महाराष्ट्राला देण्यात येणार असल्याचं राष्ट्रवादीचे सर्वेसर्वा शरद पवार यांनी माध्यमांना दिली आहे
शरद पवार यांनी बैठकीतून बाहेर येत अत्यंत महत्त्वाची माहिती माध्यमांन दिली. यामध्ये महाराष्ट्रातील मुख्यमंत्रीपदासाठी उद्धव ठाकरे यांच्या नावावर एकमताने संमती झाल्याचं पवारांनी नमूद केलं. त्यामुळे महाविकास आघाडीकडून आता उद्धव ठाकरे यांच्या नावावर शिकामोर्तब झाल्याचं बोललं जातंय.
चर्चा योग्य आणि सकारात्मक दिशेने सुरु असल्याची माहिती शिवसेना पक्ष प्रमुख उद्धव ठाकरे यांनी माध्यमांना दिली आहे. कोणत्याही मुद्यावर चर्चा अनुत्तरीत राहू नये म्हणून आणखी चर्चा होणार असल्याची माहिती उद्धव ठाकरे यांनी दिली. त्यानंतर माध्यमांना सविस्तर माहिती ही देण्यात येणार आहे.
या बैठकीत सत्तेतील पदांचे वाटप कशा प्रकारे होणार ? शेतकऱ्यांचे प्रश्न कशा प्रकारे सोडवले जाणार ? याचबरोबर कॉमन मिनिमम प्रोग्रामवर चर्चा झाल्याची माहिती सूत्रांकडून मिळतेय.