नागपूर आणि बीड यांचे संघर्ष पहिल्यापासून चालत आले असून नितीन गडकरी जाणीवपूर्वक गोपीनाथ मुंडे यांना ट्रॅपमध्ये अडकवत होते, असा गौप्यस्फोट शिवसेना ठाकरे गटाच्या उपनेत्या सुषमा अंधारे यांनी एका जाहीर सभेत केला आहे. आता देवेंद्र फडणवीस हे पंकजा मुंडे यांना अडकवत असल्याचे सुषमा अंधारे यांनी सांगितले आहे.
टिकली वरुन एका महिला पत्रकाराला बोलणारे संभाजी भिडे गुरुजी अमृता फडणवीस यांच्या मंगळसुत्रावरील वक्तव्यावर बोलतील का? असे वक्तव्य सुषमा अंधारे यांनी करत भिडे गुरुजींवर पलटवार केला आहे. मुंबईच्या महिला पत्रकाराला मुलाखत घेताना टिकली नाही म्हणून मी बोलत नाही, असे वक्तव्य भिड़े गुरुजी यांनी केले होते. दरम्यान, अमृता फडणवीस यांना मंगळसूत्र घातले की, मला गळा आवळल्यांसारखे होते, त्यामुळे संस्कृती जपणारे भिडे गुरुजी अमृता फडणवीस यांना जाब विचारतील का? असा प्रश्न अंधारे यांनी विचारला आहे.
सुषमा अंधारे यांची यात्रा महाप्रबोधन यात्रा भंडारा जिल्ह्यात पोहोचली आहे. भंडारा जिल्ह्यातील सभेत सुषमा अंधारे यांनी भाजपवर जोरदार टीका केली. आपल्या मुलीच्या फोटो भेट स्वरुपात पाहून सुषमा अंधारे जाहीर सभेत रडल्या. मागील महिनाभरापासून शिवसेना ठाकरे गटाच्या उपनेत्या सुषमा अंधारे या महाप्रबोधन यात्रेनिमित्त राज्याच्या दौऱ्यावर आहेत. त्यामुळे त्यांच्या चिमुकलीची भेट न होत असल्याने त्या भावुक झाल्याचे चित्र भंडारा येथील सभेदरम्यान पाहायला मिळाले. भंडारा येथील पदाधिकाऱ्यांनी सुषमा अंधारे यांना त्यांच्या छोट्या मुलीचा एक फोटो सप्रेम भेट दिल्यानंतर त्या जाहीर सभेत भावूक होताना दिसल्या.