राज्यात मराठा आरक्षणाचा मुद्धा तापत असताना दुसरीकडे आघाडी सरकारला आता सर्व विरोधकांनी घेरण्याचा प्रयत्न केला आहे. त्यातच आता मराठा आरक्षणाच्या मुद्द्यावरून मराठा आक्रोश मोर्चाचे आयोजक नरेंद्र पाटील यांनी आघाडी सरकारवर घणाघाती टीका केली आहे.
आता यापुढे मराठा आक्रोश मोर्चा काढतांना तारीख देणार नाही, थेट अ‍ॅटॅक करू. मराठा समाजाला लवकरात लवकर आरक्षण द्या, त्यांना नक्षलवादी होऊ देऊ नका, असे आवाहन मराठा आक्रोश मोर्चाचे आयोजक नरेंद्र पाटील यांनी सरकारला केले आहे.
यावेळी संचारबंदीचे आदेश झुगारून हजारो मराठा तरुणांनी या मोर्चात भाग घेतला. ‘एक मराठा, लाख मराठा’ आणि ‘कोण म्हणतं देणार नाय, घेतल्याशिवाय राहणार नाय’, अशा घोषणा देत आंदोलकांनी संपूर्ण परिसर दणाणून सोडला. या मोर्चात हजारो तरुण सहभागी झाल्याने पोलीस यंत्रणांचेही धाबे दणाणले. त्यामुळे पोलिसांनी अनेकांची धरपकड केल्याने आंदोलक प्रचंड संतप्त झाले होते.
मराठा आक्रोश मोर्चाचे आयोजक आणि माजी आमदार नरेंद्र पाटील यांनी आक्रोश मोर्चाची हाक दिली होती. पोलिसांनी या मोर्चाला परवानगी नाकारली होती. त्यासाठी संचारबंदी लागू असल्याचं आणि कोरोनाचं कारणही देण्यात आलं होतं. मात्र, संचारबंदीचे आदेश झुगारून पाटील यांनी मोर्चा काढला. संभाजी चौकात सकाळीच आंदोलक जमू लागले. त्यानंतर दुपारी ही गर्दी प्रचंड वाढल्याने आंदोलकांच्या घोषणाही दणाणू लागल्या. यावेळी पोलिसांनी अनेक कार्यकर्त्यांना सोलापूरच्या वेशीवर अडवले. काहींची धरपकड केली. त्यामुळे नरेंद्र पाटीलही संतप्त झाले होते. दुपारी या मोर्चात प्रचंड गर्दी झाली.
यावेळी नरेंद्र पाटील थेट गर्दीत गेले. त्यांनी आंदोलकांना संबोधित करण्यास सुरुवात केली. त्यावेळी अचानक मोर्चात ढकलाढकली सुरू झाली. गर्दी प्रचंड होती. पोलिसांनी नाकाबंदी केल्यामुळे अनेकांची अडचण झाली. टेंभुर्णी येथे आमदार रणजितसिंह मोहिते-पाटील, भाजपा नेते धैर्यशील मोहिते-पाटील यांच्यासह भाजपा कार्यकर्त्यांनी पोलिसांच्या दडपशाहीचा विरोध करीत रस्ता रोको केला