मुंबई | एका बाजूला गद्दारांच्या डोळ्यातले विकृत हासू आणि दुसऱ्या बाजूला शिवसैनिकांच्या डोळ्यातले अश्रू यातून मला मार्ग काढायचं आहे असं शिवसेना पक्षप्रमुख उद्धव ठाकरे यांनी म्हटलं आहे. शिवसैनिकांच्या डोळ्यातल्या अश्रूंची किंमत मोजावी लागणार असा इशारा उद्धव ठाकरे यांनी बंडखोर आमदारांनी दिला आहे. ज्यांच्यावरती विश्वास ठेवला त्यांनीच विश्वासघात केल्याचं सांगत उद्धव ठाकरेंनी पहिल्यांदाच बंडखोरांचा उल्लेख गद्दार असा केला आहे.
उद्धव ठाकरेंनी आज शिवसेनेच्या महिला पदाधिकाऱ्यांची बैठक घेतली. त्यावेळी मार्गदर्शन करताना उद्धव ठाकरे म्हणाले की, ज्यांच्यावरती विश्वास ठेऊ नका असं सांगितलं ते अजूनही सोबत आहेत. ज्यांच्यावर विश्वास ठेऊन मी निवांत होतो त्यांनीच विश्वासघात केला. या सगळ्यातून मी मार्ग काढणार. शिवसैनिकांच्या डोळ्यातल्या अश्रूंची किंमत मोजावी लागणार.
उद्धव ठाकरे यांनी वेगवेगळ्या बैठकींचा सपाटा लावला आहे. त्याचाच एक भाग म्हणून त्यांनी आज शिवसेनेच्या महिला पदाधिकाऱ्यांची बैठक घेतली. त्यामध्ये बोलताना उद्धव ठाकरे म्हणाले की, काल एका पत्रकार परिषदेमध्ये मुख्यमंत्र्यांसमोरील माईक उपमुख्यमंत्री देवेंद्र फडणवीस यांनी हिसकावून घेतला. आज माईक हिसकावला, उद्या काय काय हिसकातील हे काही जणांना समजणार नाही.