काही लोकांना शो करण्याची सवय आहे’, असं म्हणत राष्ट्रवादीचे नेते आणि राज्याचे विरोधी पक्षनेते अजित पवार यांनी मुख्यमंत्री एकनाथ शिंदे यांच्यावर अप्रत्यक्षपणे निशाणा साधला. अजित पवारांनी केलेल्या टीकेला एकनाथ शिंदे यांचे पुत्र आणि खासदार श्रीकांत शिंदे यांनी उत्तर दिलंय. श्रीकांत शिंदेंनी पहाटेच्या शपथविधीचा दाखला देत हा शोले आहे, असं म्हणत वर्मावर बोट ठेवलं आहे.
मुख्यमंत्री एकनाथ शिंदे हे सध्या गणेशोत्वानिमित्त वेगवेगळ्या राजकीय पक्षाच्या नेत्यांच्या घरी गणपती दर्शनाला जाताना दिसत आहेत. यावेळी त्यांच्यासोबत माध्यमांचे कॅमेरे असतात. यावरून विरोधी पक्षनेते अजित पवारांनी एकनाथ शिंदेंवर नामोल्लेख टाळत टीका केली.
अजित पवारांनी एकनाथ शिंदेंवर केलेल्या टीकेला श्रीकांत शिंदेंनी प्रत्युत्तर दिलं आहे. श्रीकांत शिंदेंनी एक ट्विट केलं आहे. या ट्विटमध्ये श्रीकांत शिंदेंनी पहाटेच्या शपथ विधीवरून अजित पवारांना टोला लगावला आहे. आता या टीकेला राष्ट्रवादी काय प्रतिउत्तर देते हे पाहावे लागणार आहे.