बंगळुरु : कर्नाटकची राजधानी बंगळुरुमध्ये काल विरोधी पक्षांच्या संयुक्त बैठकीचं आयोजन करण्यात आलं होतं. देशभरातील २६ राजकीय पक्षांचे नेते त्या बैठकीला उपस्थित होते. या नेत्यांच्या स्वागताला अधिकाऱ्यांना पाठवल्याच्या मुद्यावरुन भाजप आमदार आक्रमक झाले होते. भाजप आमदारांनी विधानसभेत या मुद्यावरुन वेलमध्ये उतरत गोंधळ घातला. यावेळी भाजपच्या आमदारांनी विधेयकाचे कागद फाडून उपाध्यक्षांवर फेकले. यामुळं भाजपच्या १० आमदारांवर कारवाई करण्यात आली आहे. भाजपच्या १० आमदारांचं निलंबन करण्यात आलं आहे. कर्नाटकचे विधानसभा उपाध्यक्ष रुद्राप्पा लमानी यांच्यावर कागद फेकल्या प्रकरणी १० आमदारांना विधिमंडळ अधिवेशनाच्या उर्वरित कालावधीसाठी निलंबित करण्यात आलं आहे.
विधानसभा उपाध्यक्ष रुद्राप्पा लमानी यांनी जेवणाची सुट्टी न घेता कामकाज सुरु ठेवल्यानं भाजपचे नेते आक्रमक झाले होते. कर्नाटकच्या काँग्रेस सरकारनं आयएएस अधिकाऱ्यांचा विरोधी पक्षांच्या बैठकीसाठी गैरवापर केल्याचा आरोप भाजपनं केला होता. भाजपचे आमदार या प्रकरणी आक्रमक झाले होते.
विधानसभा अध्यक्ष यू.टी. खादेर यांच्या अनुपस्थितीत उपाध्यक्ष रुद्रापा लमाणी कामकाज पाहत होते. गोंधळामध्ये देखील त्यांनी कामकाज सुरु ठेवलं होतं. त्यांनी जेवणाचा ब्रेक न घेता कामकाज सुरु ठेवणार असल्याचं जाहीर केलं होतं. ते अर्थसंकल्प आणि पुरवणी मागण्यांवर चर्चा सुरु ठेवत होते.
कर्नाटक विधानसभा अध्यक्ष खादेर यांनी ज्या आमदारांना जेवण करायचं आहे ते जेवण करुन आल्यानंतर चर्चेत सहभागी होऊ शकतात, असं म्हटलं होतं.
भाजप आणि धजदच्या आमदारांनी सभागृहातील वेलमध्ये उतरत आंदोलन सुरु केलं होतं. काँग्रेस सरकारनं ३० आयएएस अधिकाऱ्यांना काँग्रेसच्या मित्रपक्षांच्या नेत्यांची सेवा करण्यासाठी पाठवल्याचा आरोप भाजप आणि धजदच्या आमदारांनी केला. भाजपचे आमदार आक्रमक झाले आणि त्यांनी कागद उपाध्यक्षांवर भिरकावले.
जेवणाचा ब्रेक न घेता कामकाज सुरु ठेवल्यानं भाजप आमदार आक्रमक झाले. भाजप आमदारांनी सभागृहात गोंधळ घालण्यास सुरुवात केली. त्यापैकी काही आमदारांनी उपाध्यक्षांवर कागद भिरकावले. यावेळी विधानसभेतील मार्शल्सनी उपाध्यक्षांचं संरक्षण केलं. यानंतर भाजपच्या १० आमदारांवर अधिवेशनाच्या उर्वरित कालावधीसाठी निलंबनाची कारवाई करण्यात आली.
कोणाचं निलंबन झालं?
सीएन अश्वथ नारायण, सुनील कुमार, आर अशोक, वेदव्यास कामत, यशवल सुवर्ण, धीरर मुनिराज, उमानाथ कोटियन, अरविंद बेल्लाड, अरग जनेंद्र, भारत शेट्टी या आमदारांचं निलंबन करण्यात आलं. तर, एच. के. पाटील यांनी निलंबनाचा प्रस्ताव मांडला.
