नवी दिल्ली: पंतप्रधान नरेंद्र मोदी यांनी आज ७४व्या स्वातंत्र्यदिनानिमित्त लाल किल्ल्यावर ध्वजारोहण केले. त्यानंतर त्यांनी देशाला संबोधित केलं. यादरम्यान पंतप्रधान मोदींनी एक महत्त्वपूर्ण घोषणा केली की आजपासून देशात राष्ट्रीय डिजिटल आरोग्य अभियान (National Digital Health Mission) सुरू होत आहे. या योजनेंतर्गत, देशातील प्रत्येक नागरिकाला एक आरोग्य आयडी देण्यात येईल. ज्यात प्रत्येक नागरिकाच्या आरोग्य समस्यांचा संपूर्ण अहवाल असेल. हे अभियान आरोग्याच्या क्षेत्रातील एक क्रांतिकारक पाऊल असल्याचे पंतप्रधा मोदींनी म्हटलं आहे. याचा फायदा सर्वसामान्य नागरिकांना निश्चितच होणार आहे.
पंतप्रधान मोदींनी आपल्या भाषणात याबाबतची घोषणा करताना म्हटलं की, ‘आजपासून देशात आणखी एक मोठी मोहीम सुरू होणार आहे. हे नॅशनल डिजिटल हेल्थ मिशन. यामुळे भारतात या क्षेत्रात नवीन क्रांती येईल. यामध्ये तंत्रज्ञानाची महत्त्वपूर्ण भूमिका असणार आहे. उपचारातील त्रास कमी करण्यासाठी तंत्रज्ञानाचा बराच वापर केला जाईल. प्रत्येक भारतीयांना आरोग्य आयडी देण्यात येईल. हा आरोग्य आयडी प्रत्येक भारतीयांच्या आरोग्य खात्याप्रमाणे कार्य करेल.’
काय आहे डिजिटल हेल्थ मिशन?
पीएम मोदी यांनी म्हटल्यानुसार डिजिटल हेल्थ मिशन अंतर्गत, या मिशन प्रत्येक भारतीय नागरिकाला एक आरोग्य आयडी प्रदान करण्यात येईल. ज्यात नागरिकांच्या आरोग्याचा संपूर्ण तपशील असेल. आपली प्रत्येक चाचणी, प्रत्येक रोग, आपण कोणत्या डॉक्टरांकडून औषध घेतले आणि त्यांनी काय उपचार केले होते. हे उपचार कधी घेतले होते आणि आपला अहवाल काय होता. ही सर्व माहिती या हेल्थ कार्डमध्ये समाविष्ट असणार आहे. या राष्ट्रीय डिजिटल आरोग्य मोहिमेद्वारे सर्व प्रकारच्या समस्यांवर मात करण्याचा प्रयत्न केला जाईल.
असा होईल फायदा
या आयडीमध्ये पर्याय दिला जाईल की, तुम्हाला हा आयडी आधारशी लिंक करायचा आहे की नाही हे पूर्णपणे तुमच्यावर अवलंबून असणार आहे. या कार्डमध्ये आपल्या आरोग्याविषयक जी काही माहिती असेल ती सुरक्षित असणार आहे. कारण ती डिजिटल लॉकरमध्ये असणार आहे. याद्वारे, आपल्याला एक यूनिक आयडी प्रदान केला जाईल आणि जेव्हा आपण कोणत्याही रुग्णालयात किंवा डॉक्टरांकडे उपचारासाठी जाल, तेव्हा आपल्याला कोणतीही कागदपत्रं किंवा चाचणी अहवाल घेऊन जावी लागणार नाहीत. फक्त या आयडीने आपली रुग्णालयातील कामं होतील. जर आपण इस्पितळात जाऊ शकत नसल्यास, डॉक्टर कोठेही बसून आपले सर्व वैद्यकीय अहवाल पाहू शकतात.
आरोग्य राज्यमंत्र्यांनी केले ट्वीट
केंद्रीय आरोग्य आणि कुटुंब कल्याण राज्यमंत्री अश्विनी कुमार चौबे यांनी ट्वीट केले की, ‘राष्ट्रीय डिजिटल आरोग्य मिशनसाठी आदरणीय पंतप्रधान नरेंद्र मोदी यांचे आभार. हे आरोग्य क्षेत्रासाठी एक क्रांतिकारक पाऊल आहे. आरोग्याशी संबंधित सर्व माहिती एका क्लिकवर मिळू शकते. डिजिटल प्लॅटफॉर्मवर रेकॉर्ड ठेवणे खूप फायदेशीर ठरणार आहे.’
वैयक्तिक आरोग्याच्या नोंदी
या खासगी नोंदींमध्ये नागरिकाची सर्व आरोग्यविषयक माहिती असेल. त्यात जन्मापासून प्रतिकारशक्ती, शस्त्रक्रिया, प्रयोगशाळेच्या चाचण्यांपर्यंतची सर्व माहिती असेल. त्याचा संबंध प्रत्येक नागरिकाच्या आरोग्य आयडीशी जोडला जाईल. हे खाजगी आरोग्य रेकॉर्ड असे सांगितले जात आहे कारण त्यामध्ये कोणीतरी त्यांचा डेटा स्वत: च्या मालकीचा असेल.
या रेकॉर्डच्या माध्यमातून कॉन्सॅट मॅनेजर काम करेल, ज्याअंतर्गत जर एखाद्या डॉक्टरलाही रुग्णाचा डेटा किंवा अहवाल पहायचा असेल तर त्या व्यक्तीला एक संदेश येईल की डॉक्टर अहवालाकडे पहात आहेत आणि डॉक्टर किती काळ हा अहवाल पाहू शकतात.
या अ‍ॅपचा हा सर्वात मोठा फायदा आहे की जर एखादी व्यक्ती किंवा रुग्ण सहमत नसेल तर सरकारला त्याचा डेटा पाहता येणार नाही.