सध्या राज्याच्या अंधेरी पूर्व पोटनिवडणुकीकडे संपूर्ण महाराष्ट्राचे लक्ष लागलेले आहे. तसेच, आमदार रमेश लटके यांच्या मृत्यूनंतर याठिकाणी पोटनिवडणूक पार पडत आहे. रमेश लटके यांच्या जागी त्यांच्या पत्नी ऋतुजा लटके या निवडणूक लढवत आहेत. दरम्यान, शिवसेना (उद्धव बाळासाहेब ठाकरे) पक्षाकडून त्यांना उमेदवारीही देण्यात आली आहे. शुक्रवारी हजारो समर्थकांच्या उपस्थितीत ऋतुजा लटके यांनी निवडणुकीचा अर्ज दाखल केला. त्यानुसार आजपासून त्यांच्या प्रचाराला सुरूवात झाली आहे.
यामध्येच माध्यमांशी बोलताना ऋतुजा लटके म्हणाल्या, लोक मला बहुमताने निवडून देतील. ३ तारखेला सर्वकाही स्पष्ट होईल, असे वक्तव्य त्यांनी केले आहे. रमेश लटके ज्याप्रमाणे गणपती मंदिराचे दर्शन घेऊन प्रचाराला सुरूवात करायचे. तशीच सुरूवात आता आम्ही केली आहे. माझ्या प्रचार सभेला सगळे आपले जुने शिवसैनिक, कार्यकर्ते आणि पदाधिकारी उपस्थित आहेत.
आजपासून हा प्रचार सुरू होतोय. काल अर्ज दाखल करताना लोकांनी मोठी गर्दी केली होती. रमेश लटके यांच्याबाबत लोकांचे असलेले प्रेम आणि निष्ठा माझ्यासोबत कायम असल्याचे यातून दिसले असे त्यांनी सांगितले. पक्षाशी निष्ठावंत असलेले सगळेजण माझ्यासोबत आहेत, हेच आम्हाला ३ तारखेला दाखवून द्यायचे आहे. यासाठी सगळे शिवसैनिक माझ्यासोबत आहेत. लोक मला बहुमताने निवडून देतील, असा विश्वासही ऋतुजा लटके यांनी व्यक्त केला आहे.
