चेन्नई:- इंडियन प्रीमियर लीगच्या सोळाव्या हंगामात महेंद्रसिंह धोनीच्या नेतृत्त्वाखाली चेन्नई सुपर किंग्सनं जेतेपद पटकावलं. गुजरात टायटन्सचा पराभव करत धोनीच्या चेन्नईनं बाजी मारली. चेन्नईनं पाचव्यांदा आयपीएलच्या ट्रॉफीवर नाव कोरलं. यानंतर धोनी रांचीतील त्याच्या मूळ घरी कुटुंबासोबत वेळ घालवत आहे. गेल्या काही दिवसांमध्ये धोनीचे अनेक व्हिडीओ व्हायरल झाले आहेत.
विमान प्रवास करणारा धोनी, कार चालवताना वाहतूक अधिकाऱ्याच्या विनंतीवरुन थांबलेला धोनी, व्हिंटेज कार चालवणारा धोनी अशी कॅप्टन कूलची अनेक रुपं गेल्या काही दिवसांत पाहायला मिळाली. धोनीच्या कार आणि बाईक्सच्या कलेक्शनचा व्हिडीओ तुफान व्हायरल झाला. माजी क्रिकेटपटू व्यंकटेश प्रसाद धोनीच्या घरी गेला होता. त्यावेळी धोनीनं त्याला त्याच्या कार आणि बाईक्सचं कलेक्शन दिसलं. धोनीच्या ताफ्यात असलेल्या शेकडो बाईक्स, व्हिंटेज कार पाहून प्रसाद अक्षरश: थक्क झाला.
चेन्नईच्या थालाचा नवा व्हिडीओ सोशल मीडियावर व्हायरल झाला आहे. त्यात कारमध्ये बसलेला धोनी दिसत आहे. धोनी ड्रायव्हिंग सीटच्या शेजारी बसला आहे. कार थांबवून तो काही जणांना रस्ता विचारत आहे. दुसऱ्या मूर्तीकडून वळायचं का, असा प्रश्न धोनीनं केला आहे. त्यावर वाटसरु त्याला रस्ता सांगताना दिसत आहेत. या वाटसरुंनी धोनीकडे फोटोचा आग्रह धरला. धोनीनं तो हसतहसत पूर्ण केला. वाटसरुंनी धोनीला बोटांनी विजयाची खूण करण्याची विनंती केली. धोनीनं चाहत्यांची ही मागणीदेखील पूर्ण केली.
धोनीच्या नेतृत्त्वाखालीच चेन्नईचा संघ पुढील आयपीएलमध्ये खेळेल अशी दाट शक्यता आहे. गुडघ्याला झालेल्या दुखापतीमुळे सोळाव्या हंगामात धोनी खालच्या क्रमांकावर फलंदाजीला यायचा. त्याच्या गुडघ्यावर यशस्वी शस्त्रक्रिया झाली आहे. त्यामुळे धोनी पुढील हंगामातही चेन्नईचं नेतृत्त्व करू शकतो.