मुंबई महापालिका निवडणुकीच्या पार्श्वभूमीवर भारतीय जनता पक्षाने जोरदार तयारी सुरु केली आहे अशातच येणाऱ्या मुंबई मानपा निवडणुकीच्या पार्श्वभूमीवर पक्षाची ताकद वाढवण्यासाठी स्वतः पंतप्रधान नरेंद्र मोदी मुंबईत येणार असल्याची माहिती आहे. येत्या १० फेब्रुवारीला ते बोहरा समाजाच्या कार्यक्रमाला उपस्थित राहणार असल्याचे समजते. मुंबई महापालिका निवडणुका जवळ आल्याने मोदी यांच्या मुंबईतील भेटीगाठी वाढल्याची चर्चा यानिमित्ताने राजकीय वर्तुळात सुरु आहे.
बोहरा समाजाच्या वतीने बांधण्यात आलेल्या रुग्णालयाच्या लोकार्पण सोहळ्यासाठी पंतप्रधान नरेंद्र मोदी मुंबईत येणार असल्याचे समजते. यासंबंधी बोहरी समाजाच्या शिष्टमंडळाने उपमुख्यमंत्री देवेंद्र फडणवीस यांचीही भेट घेऊन या कार्यक्रमाची माहिती दिली. मुंबई महापालिका निवडणुका जवळ आल्या असून कोणत्याही क्षणी निवडणूक आयोगाकडून निवडणूक कार्यक्रम जाहीर होण्याची शक्यता आहे. राज्यात सत्ता परिवर्तन झाल्यानंतर ही निवडणूक भाजपासाठी प्रतिष्ठेची मानली जाते.
गेल्याच आठवड्यात मुंबई महापालिकेच्या विविध विकासकामांच्या लोकार्पणासाठी मोदी मुंबईत आले होते. यावेळी त्यांनी विरोधकांवर टीका करताना भाजपच्या हातात मुंबई महापालिकेची सत्ता देण्याचे आवाहन केले होते. त्यानंतर आता पुन्हा मोदी मुंबई दौऱ्यावर येत आहेत. मुंबईत मोठ्या संख्येने बोहरी समाज आहे. या समाजाला आपलेसे करण्यासाठीच मोदींचा हा दौरा असल्याचे बोलले जात आहे.मुंबई महापालिकेत भाजपला एक हाती सत्ता मिळवायची असल्यास त्यांना मुंबईत राहणाऱ्या सर्व धर्मांच्या तसेच समाजाच्या मतदारांचा पाठिंबा आवश्यक आहे. त्यासाठीच भाजपाकडून प्रयत्न करण्यात येत असल्याचे चित्र आहे.
