कोल्हापूर उत्तर विधानसभा पोट निवडणुकीचीय पार्श्वभूमीवर महाविकास आघाडीकडून जयश्री जाधव यांना उमेदवारी जाहीर झाल्यामुळे माजी आमदार राजेश क्षीरसागर नाराज असल्याचे बोलले जात असताना आता खुद्द राजेश क्षीरसागर यांनी कालआपल्या मध्यवर्ती कार्यालयाच्या बाहेरून शिवसैनिकांशी आणि माध्यमांशी संवाद साधला होता.
क्षीरसागर म्हणाले की, मी कडवा शिवसैनिक आहे. ठाकरे कुटुंबाचा निष्ठावंत आहे. यामुळे त्यांनी टाकलेला शब्द खाली पडू देणार नाही.शिवसैनिकच काँग्रेसच्या उमेदवार जयश्री जाधव यांना निवडून आणतील, अशी ग्वाही शिवसेनेचे माजी आमदार राजेश क्षीरसागर यांनी रविवारी कार्यकर्त्यासमोर बोलताना दिली.
कोल्हापूर उत्तर मतदार संघाच्या पोटनिवडणूकीत क्षीरसागर यांची निवडणूक लढवण्याची इच्छा होती. कार्यकर्त्यांचा तसा दबाव होता. परंतु महाविकास आघाडीच्या धोरणानुसार ही जागा दिवंगत आमदार चंद्रकांत जाधव हे काँग्रेसचे असल्याने त्याच पक्षाच्या वाट्याला गेली. त्यानंतर नाराज झालेले क्षीरसागर नॉट रीचेबल होते. यामुळे ते कोणता निर्णय घेतात याबद्दल उत्सुकता होती.