डोंबिवली | कल्याण-डोंबिवली महानगर पालिका निवडणुकीला अवघे काही दिवस शिल्लक राहिलेले असताना आता राजकीय वातावरण चांगलेक्च तापू लागले आहे अशातच भाजपने थेट ठाणे जिल्ह्याचे पालकमंत्री आणि शिवसेना नेते एकनाथ शिंदे यांच्यावर निशाणा साधला आहे.
पालकमंत्री एकनाथ शिंदे हेच डोंबिवलीच्या विकासाचे मारेकरी आहेत असा आरोप करत शिंदे यांच्याविरोधात डोंबिवली शहरात बॅनरबाजी केली होती.त्यानंतर आज सेनेनं सुद्धा बॅनरबाजी करत भाजपा आमदार रवींद्र चव्हाण यांना टार्गेट केलंय. त्यामुळे शहरात निवडणुकीच्या तोंडावर बॅनरवॉर चांगलंचं तापलेलं दिसून येत आहे.
शिवसेनेने बॅनरमध्ये आम्ही करून दाखवले तुम्ही गाजर दाखवलं, तीन वेळा आमदार, तीन वर्षे मंत्री राहिलेले निष्क्रिय लोकप्रतिनिधीच विकासाचा खरा मारेकरी, डोंबिवलीसाठी काय केलं ते सांगा, तीन कामे तरी दाखवा असं आवाहन करण्यात आलयं. इतकंच नाही तर गाजराचा फोटो देखील लावण्यात आलाय. मात्र, अवघ्या काही तासाभरातच हे बॅनर केडीएमसीनं पोलिसांच्या मदतीनं काढले.
भाजप आमदार रवींद्र चव्हाण यांनी मुंबईमध्ये पत्रकार परिषद घेत एकनाथ शिंदे यांना लक्ष केलं होतं. पालक मंत्री एकनाथ शिंदे डोंबिवलीच्या विकासाचे मारेकरी असल्याचा खळबळजनक आरोप चव्हाण यांनी केला होता. यानंतर डोंबिवलीत या आशयाचे बॅनर देखील भाजपकडून लावण्यात आले होते. याला आता सेनेनं बॅनर लावून प्रत्युत्तर दिलं आहे.
