एच सुदर्शन
पिंपरी: लोकसभा निवडणुकीच्या चौथ्या टप्प्यात राज्यातील मावळ लोकसभा मतदारसंघात मतदान होत असून महाआघाडी तर्फे राष्ट्रवादीचे ज्येष्ठ नेते व माजी उपमुख्यमंत्री अजित पवार यांचे सुपुत्र पार्थ पवार निवडणुकीच्या आखाड्यात असल्याने पवार कुटुंब व राष्ट्रवादीसाठी ही लढत प्रतिष्ठेची बनली आहे.
या लढतीसाठी शेवटच्या टप्प्यात राज्यभरातून राष्ट्रवादीच्या बड्या नेत्यांची फौज 29 एप्रिलपर्यंत मावळमध्ये तळ ठोकुन आहे. अजित पवार, शरद पवार यांनीही वेळोवेळी जाहीर सभांमधून पार्थला संधी देण्याचं आवाहन केलेलं आहे. पवारांच्या आवाहनाला मतदार कसा प्रतिसाद देतात हे पाहणे महत्त्वाचे राहील. अजित पवारांनी जुन्या समर्थकांची जुळवाजुळव करून पुण्यातील राष्ट्रवादीच्या कार्यकर्त्यांची फौजच मावळमध्ये कामाला लावली आहे.मावळ मध्ये मराठवाडा सह सोलापूर भागातील हजारो मतदार असल्याने या भागातील नेत्यांनी तिथे बैठका घेतल्या. शिवाय शेकापसोबत आघाडी असल्याने राष्ट्रवादीची बाजू येथे भक्कम मानली जात आहे.शेकापचे जयंत पाटील यांनी पार्थ ची उमेदवारी मागून घेतल्याने त्यांच्या साठी पार्थ चा विजय होणे महत्वाचा आहे.
बारणेंसाठी अस्तित्वाची लढत
विद्यमान खासदार श्रीरंग बारणे यांच्यासाठी ही निवडणूक जणू अस्तित्वाचीच लढाई आहे. त्यांच्याविरोधात यावेळी बलाढ्य पवार कुटुंबातील उमेदवाराने शड्डू ठोकलेले आहेत. बारणेंच्या विजयासाठी अख्खे कुटुंब प्रचारात उतरले आहे. याशिवाय मुख्यमंत्री देवेंद्र फडणवीस, शिवसेनेचे कार्याध्यक्ष उद्धव ठाकरे, पालकमंत्री गिरीश बापट, युवासेना प्रमुख आदित्य ठाकरे, रामदास कदम, डॉ. नीलम गोऱ्हे, नितीन बानगुडे पाटील, आमदार लक्ष्मण जगताप, बाळा भेगडे, गौतम चाबुकस्वार, प्रशांत ठाकूर व सुरेश लाड अशी भाजप-शिवसेना नेत्यांची फौजच बारणेंच्या प्रचारासाठी मावळमध्ये उतरली. मावळ मतदारसंघात विजयाची हॅट्ट्रिक मिळवण्यासाठी शिवसेना कार्यकर्त्यांनी जय्यत तयारी केली आहे. महायुतीतील मित्रपक्ष भाजप व रिपब्लिकन पक्षाचे स्थानिक नेते व कार्यकर्तेही बारणेंच्या प्रचारासाठी सरसावले आहेत. या पार्श्वभूमीवर मावळमध्ये चुरशीची लढत होणार असल्याचे स्पष्ट आहे.
विधानसभा मतदारसंघांची स्थिती
मावळ लोकसभा मतदारसंघांतर्गत येणाऱ्या पनवेल, मावळ, चिंचवड विधानसभा मतदारसंघातून भाजप, उरण आणि पिंपरीतून शिवसेनेचा तर कर्जतमधून राष्ट्रवादीचा आमदार आहे. एकुणात मावळ लोकसभेवर शिवसेना-भाजपचे वर्चस्व आहे.
असा होता 2014चा निकाल
2014 में मध्ये श्रीरंग बारणेंनी शिवसेनेच्या तिकिटावर लढत 5,12,223 मतांसह विजय मिळवला होता. दुसऱ्या क्रमांकावर पीडब्ल्यूपीच्या तिकिटावर लढत लक्ष्मण जगताप यांनी 3,54,829 मते मिळाली होती. तिसऱ्या क्रमांकावर राष्ट्रवादीच्या सुरेश नार्वेकरांना 1,82,293 मते मिळाली होती.
मावळ – एकूण 21 उमेदवार
प्रमुख उमेदवार । शिवसेना – श्रीरंग बारणे । राष्ट्रवादी – पार्थ पवार । वंचित आघाडी – राजाराम पाटील
