बार्शी – लोकसभा निवडणुकीचा निकाल लागण्यासाठी अजून एक महिन्याचा अवधी आहे. परंतु हा निकाल लागण्यापूर्वीच बार्शी तालुक्यातील युवा शेतकरी नेता खासदार झाला आहे. उस्मानाबाद मतदारसंघातील आणि बार्शी तालुक्यातील वाणेवाडी गावातील नागरिकांनी लोकसभा निवडणुकीवर बहिष्कार टाकला होता. गावचे सुपुत्र व लोकसभेचे उमेदवार असलेल्या शंकर गायकवाड यांची गावचा खासदार म्हणून घोषणा केली आहे. शंकर गायकवाड हे शेतकरी संघटनेचे प्रदेशाध्यक्ष आहेत.
दरम्यान उस्मानाबाद लोकसभा मतदारसंघासाठी दुसऱ्या टप्प्यात 18 एप्रिल रोजी मतदान घेण्यात आले.परंतु या गावातील नागरिकांनी मतदानावर बहिष्कार टाकला होता. गावात असलेल्या असुविधांबद्दल उमेदवार आणि स्थानिक नेत्यांबद्दल नाराजी दर्शवत अख्ख्या गावाने मतदानावर बहिष्कार टाकला. विशेष म्हणजे यावेळी उमेदवार असलेल्या शंकर गायकवाड यांनीही गावच्या विनंतीला मान देत मतदानावर बहिष्कार टाकला. त्यानंतर, गावकऱ्यांनी चक्क गावचा खासदार म्हणून शंकर गायकवाड यांना घोषित केले, तसेच त्यांचा सत्कार करुन गावातून मिरवणूकही काढली आहे.
